2012 թվականին ՀՀ արտակարգ իրավիճակների նախարարության հետ համատեղ «SOS SYSTEMS» ընկերությունը Հայաստանում ստեղծել և ներդրել է նախադեպը չունեցող հակահրդեհային շուրջօրյա մոնիթորինգային համակարգ։

Կրակը մարդու կյանքի և գործունեության անբաժանելի մասն է, սակայն վերահսկողությունից դուրս գալու դեպքում այն կարող է վերածվել լուրջ վտանգի՝ պատճառելով մարդկային, նյութական և գույքային կորուստներ։

ՀՀ «Հրդեհային անվտանգության մասին» օրենքի 3-րդ հոդվածի համաձայն՝ հրդեհը չվերահսկվող այրում է, որը բարոյական, ֆիզիկական կամ գույքային վնաս է հասցնում անձին, հասարակությանն ու պետության շահերին, ինչպես նաև վտանգում մարդու առողջությունն ու կյանքը։

Միջազգային փորձը ցույց է տալիս, որ հրդեհի դեպքում արագ արձագանքն ունի առանցքային նշանակություն։ Միևնույն ժամանակ, հրդեհի մասին ահազանգը հակահրդեհային ծառայություններին կարող է հասնել ուշացումով, ինչի հետևանքով մեծանում է վնասների և մարդկային կորուստների վտանգը։

Հենց այս խնդրի լուծման նպատակով ստեղծվել է հակահրդեհային շուրջօրյա մոնիթորինգային համակարգը, որի միջոցով հնարավոր է հրդեհի կամ ծխի առաջացման մասին ազդանշանն ինքնաշխատ եղանակով, հնարավորինս կարճ ժամանակում փոխանցել ՀՀ ՆԳՆ օպերատիվ կառավարման կենտրոնի «911» արագ արձագանքման ծառայության վերահսկման վահանակ։

Համակարգի կիրառումը հնարավորություն է տալիս ժամանակին արձագանքել վտանգին, նվազեցնել հրդեհի հետևանքով առաջացող վնասները և բարձրացնել մարդկանց ու կառույցների անվտանգության մակարդակը։