Հոկտեմբերի 4-6-ը Երևանի մաթեմատիկական մեքենաների գիտահետազոտական (Մերգելյան) ինստիտուտում անցկացվեց ամենամյա «Digitec Expo» 2013 9-րդ ՏՀՏ/ԲՏ ցուցահանդեսը։ Ցուցահանդեսին ներկայացվեցին հայաստանյան և արտասահմանյան տարբեր ընկերությունների ձեռքբերումները տեղեկատվական տեխնոլոգիաների ոլորտում:
Արտակարգ իրավիճակների նախարարության Ճգնաժամային կառավարման կենտրոնի աշխատակիցները` ՃԿԿ ծառայողներ փ/ծ լեյտենանտ Տ. Ալիխանյանը, փ/ծ ենթասպա Ա. Գուլոյանը և Ք. Փիրուզյանը, ևս մասնակցություն ունեցան ցուցահանդեսին` ներկայացնելով կենտրոնի արդեն իսկ կիրառվող և իր արդյունավետությամբ աչքի ընկնող «ՍՕՍ ՍԻՍԹԵՄՍ» հակահրդեհային վերահսկման և ազդարարման ինքնաշխատ համակարգը, սահմանափակ կարողություններով անձանց համար նախատեսված ազդարարման և իրազեկման սարքերը և մեր գործընկերոջ վերջին նորարարությունը` «ՍՕՍ «911»» նոր հավելվածը` բջջային հեռախոսների օգտատերերի համար։ Հավելվածի նպատակն է դյուրին դարձնել «911» ծառայություն ահազանգելը, ինչպես նաև որոշակի տարածքում իրականացնել բաժանորդների ազդարարում և իրազեկում։
Համակարգի բացառիկ առավելություններից է ահազանգողի արագ և բավական բարձր ճշտությամբ տեղորոշումը, ինչը «911» օպերատորին հնարավորություն է տալիս առանց ահազանգողի հետ անմիջական շփման գաղափար կազմել նրա գտնվելու վայրի մասին (խնդիրը հատկապես արդիական է, երբ ահազանգողը ունի լսողական, տեսողական և խոսակցական սահմանափակ կարողություններ)։ Համակարգի մյուս առավելությունն այն է, որ ահազանգի հետ մեկտեղ օպերատորի մոտ ստացվում են տվյալներ բաժանորդի վերաբերյալ. արագ և հեշտ լրացվող հարցաթերթիկի միջոցով բաժանորդը հնարավորություն ունի իր և իր առողջական առանձնահատկությունների վերաբերյալ տեղեկատվություն փոխանցել օպերատորին, ինչը հատկապես կարևոր է հատուկ խնամքի տակ գտնվող մարդկանց համար։ Հաջորդ առավելությունն այն է, որ հնարավորություն է ստեղծվում ՃԿԿ-ից իրականացնել հնարավոր վտանգների մասին իրազեկում կոնկրետ տարածքում գտնվող բոլոր «ՍՕՍ «911»» բաժանորդներին։
Հավելվածն անվճար է, և այն կարելի է ներբեռնել «Android» համակարգով հեռախոսների համար «Play Market», «Play Store» հավելվածների միջոցով։
Շուտով հավելվածը հասանելի կլինի նաև «Windows 8» և «Iphone» պլատֆորմով հեռախոսների բաժանորդների համար։
